Kum 2018 hi kum danglam bika siem dingin thutiem (vow/oath) ni chuong lovin, inpumpekna angzawngin (commitment) ka nei a. Chu chuh midang nuna thil mak va thaw ding ni chuong lovin, kei ka mimal nuna hmang ding a nih.
Kum 1991 a'nthawka tiem chun kum 2018 hi kum 27 ka tling ve der ding an tah. Ka hei sut chun kum 30 ka tlingna dingin kum 3 a la bak a. Dam le hrisel takin um lang, kum 60 chu dam kai ding lo ni chie lang khawm, ka hun zatve chu a liem ding tina a lo ni tah. Kum 60 dam chu hieng ti khawvel bawrsawm kara hin huphur um tak a nih.
Hringnun Tawizie I Dawn Ve Hlak Am ?
Dam sawt nuomin mani nun inuluk vieu inla khawm, midang thunun thil hi ei nunah a tam ngang el si a. Entirna dingin, zu dawn leia hrisel nawna ka nei ding chu ka thunun thei a. Zu dawn leia ka nun tawi ding chu ka mimal theina khawmin ka thunun thei. A umzie chu, Pathien thanglo chu ni loin, mani nun inenkawl uluk leia hriselna tieng a nih ka zuk ti tak chu. Chuong ang chun, baua lut leia ngairuot thei ding hrisel nawna chu mi tam tak ta ding chu hneban thei khawm chu a lo nil rawi mawh. Amiruochu, an tanna (cause) hrietlo natna hi a tam ta em a nih!
Ei nuna midang thunun thil vangduoina ding le ei nun tawp theina hi kil tinah a um a. Ei kawtkai suok chara inthawkin thina thei thil hin a min huol a ni tak. Lampuiah motor ei intuokpuihai po po khawm, pakhat khan mi zuk nawr met sien, ei tawpna chu a ni'l ding a nih. Sawka (ludo) nawt anga tawl ta hnung tawl thleng thei a ni nawh. Mani fimkhur hle zing inla khawm ei chuongna motor khaltu inthlada lei dam, mi changsuol pal lei dama nun chan thei a nih. Chu lei chun, kawng iengkim hi fimkhur a ngai bek bek el.
Ei zuk hril chun, hril ding a um pei a. Mihriem nun siet theina tamzie ei hriet a. Ei hril ta po po hi pumpelin, kum 70 chu inhawi le duthusama hmang zo ding khawm ni inla, a dang chu iengtin am? ti hi zawna mitin dawn ding a nih.
Mihriem nun tawizie le ei la thi ngei dingzie hi ka ngaituo rawp hlak a. Inphat ruol lovin ei thi ding a nih. Lampui dang a helna ding a um nawh. Amiruokchu, iengleia nun khawhlo le mani thlarau nun ta dinga hrisello thil ei thaw zing el am a nih? Sawrkar sin khawm kum 40 chuong thaw thei ding a um nawh. Kum 70/80 hnunga a dang po po ei hmangna ding ram hi a nih hla siemtu'n, "A hi a nih damlai thil ngaituo ding, pawimaw le tul" a ti chuh; tuta kum 100 hnungtieng khawla'm um i ta?
Teplo El A Nih
Thuhriltu ziek ka tiem chang dam thlakhlana ka nei naw a. Mihriem nun hi a mi siemtu hin a lo engto nawzie ka hrietthiem hlak. Lal Solomonin Dam sawt khawm lungngaina chau, hriet rawn (varna) khawm lu chunga meibu sekkhawl angin a lo hrilhai hi thil indik tak vawng a nih.
Hausa chu a hausaknain in intir phal naw nih (Thuhriltu 5:12) a hei ti nawk a. A'n dik naw hi a lo um nawh. Lal Solomon, varna le hausakna tieng hnuoi mihriem a khum thei um chuong ta lo, a hril po po hi ngun taka sui chieng ngai a nih. Chu leiin, khawvel khawsaknaa invir luhai hi a lo tul naw ngei ie.... A thaw chu thaw'ng ei ta, zawng ei ta, fa bawk ei tih. Sienkhawm, thi hnung khawvel tawk pawi dingin insukhnawk naw tum ei tiu.
Thuhriltu 1:11 chun, "Chun, ka kuthaiin sin a lo thaw ta po po chu ka en a, chuonghai thawa ka lo sininrimna tahai po po chu teplo el le, lungril rimsikna el a nih, nisa hnuoia hin hlawkna hrim a lo um nawh ti ka hmuh a," a lo ti a. Iengkim a vawrtawp a tlung hnung hin lal Solomon hin "Teplohai Teplo" a ti vawng a. A pawimaw tak chu thi hnung khawvela Pathien le ei leng hmunkhat theina dinga nun khal diem diem ding a nih.
Bible Tiem Suok
Kum 26 ka hmang liem ta a, Bible bung thenkhat le ziek iemani zatzat lo tiem suok ve nuol ta lang khawm, a pumpuia tiem suokna ka la nei naw a. Kum 2018 hin chu ka aw chen chen aw dingin tiem suok lui ka tum a. Thlarau le titak taka inhnikna nei ding lem chun kan beisei nawh. A tum chu tum ka ta, thaw'ng ka ta, phek 1500 lai tiem sung chun thlarau pawlna um thaklo chun thei chuong naw nih, ti ngaidan neiin ka hei bei a.
Mi nuna ding chun thil thar a ni nawh. Nupui thenkhat, kohrana langsar raklo khawm kum khat sung Bible vawi 2/3 tiem suok an tam. Keia ding chun a bul tanna a ni tak meu a. Khawm chun hi thu ziek chena hin bu 3 bak ka la tiem suok a. A dang chu, kum 2018 sunga ni tina kan tlawnpui dinga ka ngai a nih.
Ka Experiment Tlawmte
Hi thunawi ka ziek ni hi January ni 15 2018 a nih. December ni 27 laia inthawk khan ni tin vawisun chenin Bible ka tiem hlak a. Ni tin bung 5-15 ka tiem tei tei. Hi hun sung tawite, ni 18 sung vel chau hin ka ngaituona a dang a. Ka Bible tiem ding ngawtin ka lungril a hluo a. Lekha dang tiem ding le college class fe a tul bawk, mani nuomzawng thawna ding hun dit a um bawk, hunawl a um thei nawh.
Makhata inhluoa um ka ni a, chun Hmar mi an um naw lai tak a ni bawk tulai hun hi, suol tieng chu ngaituona suol naw chu thaw ding khawm ka hriet nawh. Thenkhat ti danin, tulai chu lawr thut sien khawm kai chieng ka tih, ti ngam ding hun kha a nih. Ka hei hril tum tak chu, tawite sung Bible ka zuk ngaina ve hun sung hin mi mi hriet lovin danglam varin kan hriet a. Inhawi tina tak khawm ka nei. Khingtieng pangah thlemna le suola inhmangna ding chatlak lai tak a ni lei khawm chu ni ve bawk a ta. A ieng po khawm chu ni sien, ka hmu suok chu, Isu le inpawl ding hin mihriem ram taka khawm thawlui chu a lo tul nasa a nih.
Isu hi nunghak angin ka zuk ngairuot sin a. Mi dit si, ei va leng a, ei intuklut naw chun mi zuk bie bik lo. A mit sir chun mi mel zing si ang hin ka zuk ngairuot a. Pathien le inpawlna ding chun tawngtai, thu le hla a nih.
Tawngtai ngailo chun Pathien rawl ka hriet nawh ei ti ding reng a nih. Bible thu tiem ngailo chun lungrila inlang ding le, ei hriet dan dingin Pathienin a thu'n a mi biek thei naw ding reng a nih.
Tawngtai, thu le hla hi ei bu, hme le tui a nih. Chulei chun, hienghai hi fa ngun ei tiu.
Thu Kawmna
Hi, kumbul ei zuk sir det chau a na. Ringtu nun danglamna siem dingin Krista ringtu po poin thaw ding ei nei seng. Kum 2018 chu inru lo ding, faru lo ding, khel hril lo ding, pawrche lo ding, insel lo ding, theida lo ding, a dang dang, kawng khat bak ni lovin, a rengin thisen suok khawpa thangin hne tum ei tiu. Asanchu, nun tawizie ei hril hril a, pakhat khata zawm dinga kumpui linglet ei aw pei chun ei awi kim intak taluo ding a nih.
I ta dingin malsawm kum ni raw seh..!
Tags
Thusep (Article)